తొలి అడుగు

December 01, 2015
Hyderabad

పాపిని నేను... అయినా ఇలా శిక్షించాలా??
ద్రోహిని నేను... నా త్రోవను మరల్చనే లేవా??
నీ ఎదపై తప్పటడుగులు వేసి... నీ గుండెలను తన్నిన నీచుడిని!
నిన్ను అణగతొక్కి అందలమును అంటాలనుకున్న వెర్రివాడిని!!
నా పాపమును వేరొక రీతిన క్షాళణము చేయ మార్గము తోచలేదా??
ఆకలికి అలమటిస్తూ నలువైపుల నీ కన్నీటి ప్రవాహాన కొట్టుకుపోతున్నాను...
నీ కంటి మంటను తాళలేక అల్లాడుతున్నాను.. శాంతించి సేద తీర్చవా?? నన్ను దగ్గరకు చేర్చుకుని ఊరడించవా??
ఓడిపోయానమ్మా... ఓడిపోయాను!
నీ ముందు నిలబడే శక్తిలేక నీరసించి పోయాను!!
చాలు ఈ తాపత్రయం!
చాలు ఈ జలదిగ్బంధనం!!
మారిన మనిషిని అని బిగ్గరగా అరిచి చెప్పలేని వాడిని!
నీ జలధారలో కలసిన
నా కన్నీటినే మార్పు కోసం
నేను వేసిన తొలి అడుగుగా భావించు!!

‪#‎PrayforChennai